ព័ត៌មានលម្អិតអំពីប្លក់

ការងូតទឹកឱ្យទារក៖

ការងូតទឹកឱ្យទារក៖ គន្លឹះដើម្បីភាពរីករាយ និងសុវត្ថិភាព

ការងូតទឹកគឺជាពេលវេលាដ៏វិសេសវិសាលសម្រាប់ការសម្រាកលំហែ និងការលេងកម្សាន្ត។ ក្នុងអំឡុងពេលនេះ ទារកនឹងចាប់ផ្តើមស៊ាំនឹងទម្លាប់អនាម័យ ព្រមទាំងបានស្វែងយល់ពីរាងកាយ និងអារម្មណ៍ប្លែកៗតាមរយៈការប៉ះទង្គិចជាមួយទឹក ក្លិនសាប៊ូ និងពពុះ។ ដើម្បីឱ្យការងូតទឹកប្រព្រឹត្តទៅដោយក្តីរីករាយ និងសុវត្ថិភាព យើងមានគន្លឹះខ្លះៗមកចែករំលែក៖

១. តើគួរងូតទឹកឱ្យទារកញឹកញាប់ប៉ុណ្ណា?

• ការងូតទឹកប្រចាំថ្ងៃ៖ អ្នកអាចងូតទឹកឱ្យកូនជារៀងរាល់ថ្ងៃ ប្រសិនបើកូនចូលចិត្ត ឬនៅពេលអាកាសធាតុក្តៅខ្លាំង ព្រោះវាជួយឱ្យកូនបានសម្រាក និងគេងលក់ស្រួល។

• ប្រសិនបើកូនមិនទាន់ស៊ាំ ឬមិនទាន់ចូលចិត្តការងូតទឹក ការងូតត្រឹមតែ ២ ឬ ៣ ដងក្នុងមួយសប្តាហ៍គឺគ្រប់គ្រាន់ហើយ។

ចំណុចសំខាន់៖ ទោះមិនបានងូតទឹក ក៏ត្រូវលាងសម្អាតមុខ មាត់ ដៃ និងតំបន់កន្ទបរបស់កូនឱ្យបានទៀងទាត់ជារៀងរាល់ថ្ងៃ។

២. ការរៀបចំសម្ភារៈ 

• ឧបករណ៍ជំនួយ៖ ជ្រើសរើសអាងងូតទឹក កៅអី ឬគ្រែផ្អែកដែលសមស្របទៅតាមវ័យរបស់កូន។

• ការរៀបចំទុកជាមុន៖ រៀបចំសម្ភារៈចាំបាច់ (ទែម៉ូម៉ែត្រ សាប៊ូ កន្សែង ខោអាវ) ឱ្យនៅក្បែរដៃបំផុត ដើម្បីឱ្យអ្នកមានដៃជាប់លើទារកជានិច្ច។

សីតុណ្ហភាពទឹក និងបន្ទប់ទឹកសមស្រប

• សីតុណ្ហភាព៖

  ក្នុងបន្ទប់៖ គួរស្ថិតនៅចន្លោះពី ២២ ទៅ ២៥°C។

  ក្នុងទឹក៖ គួរមានកម្តៅ ៣៧°C។

គន្លឹះ៖ គួរប្រើទែម៉ូម៉ែត្រវាស់ទឹកឱ្យបានត្រឹមត្រូវ ឬប្រើកែងដៃសាកល្បងកម្តៅទឹកមុននឹងដាក់កូនចូល។

៣. របៀបងូតទឹកឱ្យទារក (បច្ចេកទេសងាយៗ ២ បែប)

មុននឹងចាប់ផ្តើម គួរនិយាយលួងលោមឱ្យកូនបានធូរស្បើយ និងត្រៀមខ្លួន។

មានវិធីសាស្រ្តពីរសម្រាប់ងូតទឹកឱ្យទារក៖

វិធីសាស្រ្តទី ១៖

1. ការទប់កូន៖ ប្រសិនបើកូនមិនទាន់ចេះអង្គុយ ត្រូវផ្អែកក និងក្បាលកូនលើកដៃរបស់អ្នក ហើយកាន់ក្រោមក្លៀកឱ្យជាប់ រួចប្រើដៃម្ខាងទៀតដើម្បីលាងសម្អាត។

2. ចាប់ផ្តើមពីការកក់សក់ រួចលាងមុខ និងបន្តទៅផ្នែកផ្សេងៗនៃរាងកាយ ដោយចាប់ផ្តើមពីផ្នែកដែលស្អាតបំផុតទៅផ្នែកដែលកខ្វក់បំផុត។
   
   

3. ក្រោយងូតរួច៖ លើកកូនចេញថ្នមៗ រួចរុំកន្សែងភ្លាម (បើបានកន្សែងក្តៅឧណ្ហៗកាន់តែល្អ)។ ជម្រះជាតិទឹកតាមផ្នត់ក ក្រោមក្លៀក ចន្លោះម្រាមដៃ និងផ្នត់គូទឱ្យស្ងួតល្អ។

វិធីសាស្រ្តទី ២៖

• សម្រាប់ប៉ាម៉ាក់ថ្មីថ្មោង អ្នកអាចលាបសាប៊ូឱ្យកូននៅលើតុប្តូរកន្ទបឱ្យរួចរាល់សិន សឹមលើកកូនទៅលាងជម្រះក្នុងទឹក។ វិធីនេះជួយឱ្យអ្នកមានអារម្មណ៍នឹងនរជាងមុន និងមិនសូវរអិល។

• ចាប់ផ្តើមលាបសាប៊ូពីដៃ ចុះមកដងខ្លួន ពោះ ជើង និងបញ្ចប់ត្រង់ផ្នែកគូទ រួចសឹមលើកកូនទៅកក់សក់ និងលាងខ្លួន។